Euskaltel Euskadi podiumean egoten saiatuko da bihartik Gaztela eta Leongo Itzulian

Euskaltel Euskadi txirrindularitza taldeak Gaztela eta Leongo Itzuliaren 25. edizioan parte hartuko du, bihartik igandera bitartean, podiumean egoteko helburu garbiarekin.

13/04/2010

BILBO - "Gure asmoa podiumean egotea da eta horretarako lan egin beharko dugu, haize eta arrisku handiko etapei egin beharko diegulako aurre. Erne egon beharko dugu", adierazi du Alvaro Gonzalez de Galdeanok, Gaztela eta Leonen taldearen kirol zuzendaria izango denak.

   Bere asmoak egi bihurtzeko, Euskaltel Euskadik talde "borrokalaria" eramango du Gaztela eta Leonera, Gonzalez de Galdeanok berak esan duen moduan. Hain zuzen, Igor Anton, Jorge Azanza, Gorka Izagirre, Daniel Sesma, Miguel Minguez, Jonathan Castroviejo, Francisco Javier Aramendia eta Pablo Urtasun egongo dira bihar lasterketaren irteeran.

   "Gure asmoa da taldeak lan egitea helmugetan agertzeko. Hala ere, ihesaldiak ere bilatuko ditugu eta Igor Anton sailkapen orokorreko onenen artean kokatu", iragarri du euskal txirrindularitza taldeko kirol zuzendariak.